Menjiwai Hidup Lestari

SITU BAGENDIT

Jaman baheula di daerah Garut, aya hiji randa ngaranna Nyi Bagendit atawa Nyi Endit. Manehna teh kacida beungharna, sawah jeung kebonna lega upluk-apluk, ngan hanjakal kacida meditna.
Manehna hirup nyorangan. Teu boga anak, teu boga dulur. Imahna jauh ti tatangga, mencil di tengah-tengah sawah, da sieun rijkina kasoro ku batur. Nu katinggali teh ngan ukur para badegana bae anu sok lar sup ka imah Nyi Endit.
Lamun datang usum panen, loba anu sok milu buburuh dibuat ka Nyi Endit. Pare anu geus beres diala, tuluy dipoe. Sanggeus garing tuluy diteundeun ka leuit, tepi ka sok pinuh leuit teh ku pare hasil panen.
Rengse panen biasana sok ngayakeun sukuran di imah Nyi Endit teh. Kitu deui harita oge Nyi Endit pak-pik-pek sorangan, sasadiaan keur sukuran tea.
Nyi Endit ngondang tatanggana jeung tua kampung keur pangmacakeun doa. Ceuk pikirna da teu loba anu diondangna oge, pasti nu daratangna teh moal loba, nu matak ngan ukur nyayagikeun tumpeng wungkul. Tapi teu disangka-sangka, anu datang teh sakitu lobana. Atuh sasadiaan teh kurang pisan.
Keur jongjon ondangan ngantri tumpeng anu kurang tea, kurunyung aya aki-aki geus bongkok sarta papakeanana saroek datang ka imah Nyi Endit. Maksudna mah rek menta dahareun, da manehna kacida ngarasa laparna. Tapi ku Nyi Endit, tibatan dibere mah eta aki-aki teh kalah dicarekan laklak dasar bari ditunjuk-tunjuk. Si Aki diusir ti imah Nyi Endit, mani teu boga pisan rasrasan ngusirna teh. Si Aki balik deiu bari leumpang sasampoyongan, sabab teu kuat nahan lapar.
Samemeh ninggalkeun imah Nyi Endit, Si Akinyarita bari ngaleos, yen jalma di dunya mah boh anu hade boh anu goreng pasti bakal aya wawalesna. Omongan Si Aki kitu kadengeeun ku paraundangan anu keur ngantri tumpeng.
Sabot paraondangan rek paramitan, di luar aya jalma anu gogorowokan, ngabejaan yen aya caah anu kacida gedena. Atuh paraondangan teh kacida pisan kageteunana. Sarerea pada reuwas saba ujug-ujug datang caah anu sakitu gedena, jeung duka ti mana datangna eta cai teh.
Dina waktu anu sakedeung pisan, sakabeh imah sawah, katut tanah Nyi Endit geus kakeueum ku cai. Nyi Endit kacida pisan sedihna, manehna menta tulung oge taya nu nulungan da puguh sarerea oge pada-pada nyalameutkeun diri. Waktu manehna rek lumpat ka luar ti imahna, teu kanyahoan jug-ujug aya ombak gede naggulung Nyi Endit jeung sakabeh kakayanana, musnah taya nu nyesa.
Kampung Nyi Endit salin rupa, anu tadina pasawahan jeung imah the ayeuna mah jadi talaga teh nya dingaranan Tagala Bagendit atawa Situ Bageundit.


Sumber: Carita Rakyat dan Objek Pariwisata di Indonesia Teks dan Analisis Latar